ოპოზიციის სამოქმედო გეგმა ცნობილია _ 26 მაისს სახალხო აღლუმი უნდა ჩაატაროს, მაგრამ საკითხავია, შეინარჩუნებენ თუ არა ანტინაცინალები ერთიანობას. ყოველ შემთხვევაში, ისეთი პირი უჩანს, რომ ლიდერები სხვადასხვა აზრზე დგანან. ასე, მაგალითად, “დემოკრატიული მოძრაობა _ ერთიანი საქართველოს” ლიდერი, ნინო ბურჯანაძე მიიჩნევს, რომ ხელისუფლებასთან დიალოგის გაგრძელებას აზრი არ აქვს. “მიმაჩნია, რომ ვერანაირი დიალოგი, გარდა პრეზიდენტის გადადგომის და გადადგომის პირობების საკითხებისა, ნამდვილად ვერ გაიმართება და არც უნდა გაიმართოს,” _ აცხადებს ბურჯანაძე. 

როგორც სახალხო დამცველმა, სოზარ სუბარმა განაცხადა, ამ დღეებში ნინო ბურჯანაძის პარტიის წევრებს თელავსა და ქუთაისში უკანონოდ ავტომანქანები ჩამოართვეს. “როგორც შემდეგ გაირკვა, უმრავლეს შემთხვევაში, სამართალდამცველების ქმედება უკანონო იყო და აშკარად სამართლის დევნის ფაქტს წარმოადგენდა”, _ განაცხადა ჟურნალისტებთან საუბრისას სახალხო დამცველმა, თუმცა სუბარის განცხადებას შსს კატეგორიულად უარყოფს.