 კანონმდებლობა
ადვოკატი სამართალდამცავებს ნუგზარ ოთანაძის წამებაში ადანაშაულებს მუხროვანის ინციდენტთან დაკავშირებით ძებნილი კობა ოთანაძის ძმის, ნუგზარ ოთანაძის ადვოკატი სამართალდამცავებს მისი დაცვის ქვეშ მყოფის წამებაში ადანაშაულებს. როგორც „ინტერპრესნიუსს“ ადვოკატმა ონისე მებონიამ განუცხადა, ნუგზარ ოთანაძე, რომელიც გუშინ ე.წ. მოდულის შენობაში მოინახულა, სასტიკად ნაწამებია, დაზიანებული აქვს ქვედა და ზედა კიდურები, სახის და ზურგის არე. „როგორც დაკავებული ამბობს, ნუგზარ ოთანაძე სოდ-მა დააკავა და მოდულის შენობაში ოთხმა პირმა სასტიკად სცემა. ეს პირები სამოქალაქო ფორმაში იყვნენ ჩაცმულები და ყველა მათგანის ამოცნობა ოთანაძეს შეუძლია. დაკავებულს ძმის ადგილსამყოფელის შესახებ ინფორმაციას სთხოვდნენ, თუმცა ოთანაძემ ამის შეახებ არაფერი იცოდა, რის გამოც სასტიკად გაუსწორდნენ“,-განაცხადა მებონიამ და აღნიშნა, რომ გამომძიებელმა საქმის მასალები არ გააცნო, რის გამოც არ ფლობს ინფორმაციას, რაშია ეჭვმიტანილი ნუგზარ ოთანაძე. ადვოკატის თქმით, არც დაკავებულისთვის განუმარტავთ, თუ რატომ აკავებდნენ. ნუგზარ ოთანაძე სპეციალური ოპერატიული დეპარტამენტის (სოდ) თანამშრომლებმა 12 მაისს, ღამის პირველ საათზე დააკავეს. |