 ნინო ბურჯანაძის განცხადებით, გიორგი თარგამაძეს ~იმედის~ ხელმეორედ დახურვისთვის ადრე თუ გვიან პასუხი მოეთხოვება.
ამის შესახებ ~დემოკრატიული მოძრაობა - ერთიანი საქართველოს~ ლიდერმა რადიო ~პალიტრის~ ეთერში სტუმრობისას, საპარლამენტო ოპოზიციის ლიდერის გიორგი თარგამაძის განცხადების კომენტირებისას აღნიშნა.
ნინო ბურჯანაძე გიორგი თარგამაძის იმ ნათქვამს გამოეხმაურა, სადაც ~ქრისტიან-დემოკრატების~ ლიდერი აცხადებს, რომ ჟურნალისტებისთვის ~სირცხვილის დერეფნის~ მოწყობის უფლება არავის აქვს.
~ვის რისი უფლება აქვს ეს თარგამაძის გადასაწყვეტი არ არის და რას გავაკეთებ, თარგამაძესთან არც ამის შეთანხმებას ვაპირებ. ბატონმა გიორგიმ ჯერ იმაზე აგოს პასუხი, გარიგებებითა და მაქინაციებით ხელმეორედ როგორ დახურა ჩემი და საერთაშორისო თანამეგობრობის ძალისხმევით გახსნილი ~იმედი~, - განაცხადა ბურჯანაძემ.
მისივე თქმით, ~ტელეიმედი~ რომ ყოფილიყო, არც აგვისტოს ომი იქნებოდა და არც დღევანდელი მოვლენები. ბურჯანაძემ კიდევ ერთხელ აღნიშნა, რომ ~საზოგადოებრივი მაუწყებელი~ ხალხის საკუთრებაა და ოპოზიცია მის დასაბრუნებლად ბრძოლას გააგრძელებს.
|